Ipak Yuli Bank sifat menejmenti va ekologik boshqaruv bo‘yicha xalqaro standartlar talablariga muvofiqligini muvaffaqiyatli tasdiqladi. 2025-yil noyabr oyida bank ISO 9001:2015 standarti bo‘yicha rejalashtirilgan nazorat auditidan o‘tdi. Audit natijalari amaldagi sifat menejmenti tizimining barqaror va samarali ishlayotganini tasdiqladi. 

Shuningdek, 2025-yil oxirida o‘tkazilgan ISO 14001:2015 standarti bo‘yicha qayta sertifikatlash auditi yakunlariga ko‘ra, 2026-yil yanvar oyida Ipak Yuli Bank ekologik menejment va barqaror rivojlanish sohasidagi xalqaro talablarga muvofiqligini tasdiqlovchi yangilangan sertifikatni oldi. 

Audit va sertifikatlash jarayonlari muvofiqlikni baholash va sertifikatlash sohasida jahon miqyosida yetakchi bo‘lgan xalqaro tashkilot — Bureau Veritas tomonidan amalga oshirildi. 

ISO 9001:2015 standartiga muvofiqlik bank boshqaruv tizimida muhim o‘rin tutadi va asosiy biznes jarayonlarini yagona hamda tizimli yondashuv asosida tashkil etishni ta’minlaydi. Ipak Yuli Bank uchun ushbu sertifikat rasmiy talab emas, balki boshqaruv sifatini oshirish, operatsion xatarlarni kamaytirish va mijozlar uchun xizmatlar sifatini barqaror yuqori darajada saqlashga xizmat qiladigan amaliy boshqaruv vositasidir. Sertifikatlangan sifat menejmenti tizimi raqamli va ekologik tashabbuslarni joriy etish, operatsion samaradorlikni oshirish hamda bankning barqaror rivojlanish maqsadlarini qo‘llab-quvvatlash uchun mustahkam asos yaratadi. 

Ekologik menejment tizimini rivojlantirish va barqaror rivojlanish tamoyillarini integratsiya qilish doirasida bank so‘nggi yillarda bir qator amaliy va o‘lchab bo‘ladigan tashabbuslarni amalga oshirdi. Xususan, bank avtoparki bosqichma-bosqich elektromobillarga o‘tkazilmoqda, bu esa uglerod chiqindilarini kamaytirish va atrof-muhitga ta’sirni qisqartirishga xizmat qilmoqda. 

Bank ofislarida energiya tejamkor yoritish tizimlari, elektr energiyasi va suv iste’molini optimallashtirish, shuningdek, resurslardan foydalanishni monitoring qilish kabi resurslarni tejovchi texnologiyalar joriy etilmoqda. Ayrim obyektlarda quyosh panellari o‘rnatilgan bo‘lib, bu qayta tiklanuvchi energiya manbalaridan foydalanishni kengaytirish va bankning uglerod izini yanada kamaytirishga imkon bermoqda. 

Raqamlashtirish ham bank faoliyatining muhim yo‘nalishlaridan biri bo‘lib qolmoqda. Ipak Yuli Bank elektron hujjat aylanishini faol rivojlantirib, qog‘ozdan foydalanishni sezilarli darajada qisqartirmoqda va operatsion xarajatlarni optimallashtirmoqda. Ushbu choralar ichki jarayonlar samaradorligini oshirish bilan birga, bankning ekologik ustuvor yo‘nalishlariga ham mos keladi.