Ipak Recycling
Ipak Recycling
Ipak Yuli Bank’ning chiqindilarni kamaytirish va resurslardan mas’uliyatli foydalanishga qaratilgan tashabbusi.
Biz tadbirlar, festivallar va boshqa loyihalardan keyin materiallarni chiqindiga tashlamasdan, ularni qayta ishlash va qayta foydalanish imkoniyatlarini izlaymiz. Shu tariqa chiqindiga aylanishi mumkin bo‘lgan materiallardan yangi va foydali buyumlar yaratamiz.

Hammasi qanday boshlangan
Ipak Recycling tarixi 2025-yilgi Navro‘z bayramidan boshlandi.
Bayramga tayyorgarlik ko‘rar ekanmiz, shunday savol tug‘ildi: an’anaviy tarzda tayyorlanib, yaqinlarga ulashiladigan sumalak nega bir martalik plastik qadoqda berilishi kerak?
Biz plastikdan voz kechib, qayta foydalanish mumkin bo‘lgan shisha bankachalarni tanladik. Bu kichik qaror ilk qadam bo‘ldi va vaqt o‘tishi bilan har yili Navro‘zda davom ettiriladigan an’anamizga aylandi.
Bayramdan so‘ng yana bir savol paydo bo‘ldi: bezak uchun ishlatilgan va endi kerak bo‘lmaydigan materiallarni nima qilish kerak?
Ularni chiqindiga chiqarish o‘rniga, qayta ishlash va keyinchalik foydalanish imkoniyatlarini izlay boshladik.
Bugun bu alohida ekologik aksiya emas, balki bankning turli loyihalarida qo‘llashga intilayotgan yondashuvimizdir: materiallardan yangi va amaliy maqsadlarda foydalanish imkoniyatlarini topish.

Ipak Recycling raqamlarda

Materiallar tarixi
Navro‘z 2025
Bayram bannerlari kundalik hayotning bir qismiga aylandi
Navro‘z bayrami arafasida bank filiallari va shahar ko‘chalari bayram bannerlari bilan bezatildi. Banner matosi mustahkam, suv o‘tkazmaydigan va qayta foydalanish uchun mos ekani ma’lum bo‘ldi. Undan qariyb 200 ta qayta foydalaniladigan shopper tayyorlandi.
Shunday qilib, bir necha haftalik bayram bezagi uchun mo‘ljallangan material kundalik foydalanish uchun amaliy buyumlarga aylandi.

Namangan Flower Fest 2025
Festival gullari — yangi shaklda
2025-yilda Ipak Yuli Bank mamlakatdagi eng yirik gullar festivallaridan biri — Namangan Flower Fest’ning hamkoriga aylandi.
Festival yakunlangach, odatda tadbirdan keyin qolib ketadigan gullarning bir qismini saqlab qolishga qaror qildik. Tashkilotchilar bilan birgalikda 10 ta katta quti so‘lib qolgan gullarni yig‘dik, ularni quritdik va 150 ta qo‘lda tayyorlangan sham yaratishda foydalandik.
Shamlar elchixonalar, BMT tuzilmalari kabi xalqaro tashkilotlar, bank hamkorlari, agentliklar va OAV vakillari uchun esdalik sovg‘asiga aylandi. Ular bilan birga resurslardan ehtiyotkorona foydalanish, chiqindilarni kamaytirish va zero waste tamoyillariga bag‘ishlangan murojaatni ham yetkazdik.
Shu tariqa festivalning bir necha kuniga mo‘ljallangan gullar butunlay boshqa shaklda yana foydalanish imkoniyatiga ega bo‘ldi.

Milliy Fest 2026
Festival chodirlari yangi qo‘llanish usuliga ega bo‘ldi
2026-yilgi Navro‘z bayramida Ipak Yuli Bank Milliy Fest hamkoriga aylandi. Festival infratuzilmasining asosiy elementlaridan biri katta chodirlar va tentlar edi.
Tadbir yakunlangach, 500 m² dan ortiq mustahkam va suv o‘tkazmaydigan materialni saqlab qoldik va uni qayta foydalanish uchun topshirdik. Undan 400 ta qayta foydalaniladigan shopper va 300 ta bolalar panamasi tayyorlandi.
Panamalar va shopperlarning bir qismi Ona Foundation ishtirokida Central Park’da o‘tkazilgan Grand Pharm Family Day tadbirida xayriya jamg‘armalaridan bo‘lgan bolalarga topshirildi.
Festival vaqtida mehmonlarni quyoshdan himoya qilgan material yangi shaklda o‘z vazifasini bajarishda davom etdi.

Legkoe Retro × Visa Fashion Week
Festival chodiridan dizaynerlik kolleksiyasigacha
Milliy Fest chodirlarining tarixi shu bilan tugamadi. O‘zbekistondagi Legkoe Retro brendi bilan birgalikda Visa Fashion Week doirasida namoyish etilgan cheklangan kapsula kolleksiyasini yaratdik.
Loyiha qayta ishlash va moda kesishmasidagi tajribaga aylandi: biz o‘zining dastlabki vazifasini bajargan material butunlay yangi dizaynerlik mahsuloti uchun asos bo‘lishi mumkinligini ko‘rsatmoqchi bo‘ldik. Kolleksiyaga 8 ta obraz kirdi: ikkita ikki qismli kostyum, uchta uzun va uchta kalta plash.
Namoyishdan so‘ng kolleksiya tarixi davom etdi. Obrazlar sayyohlik loyihasi qahramonlari bilan birga sayohatga chiqdi va dunyoning turli mamlakatlaridagi suratga olish jarayonlarida namoyon bo‘ldi.
Bu hamkorlik orqali zamonaviy moda tili yordamida qayta ishlash, chiqindilarni kamaytirish va materiallardan mas’uliyat bilan foydalanish g‘oyalarini yetkazdik. Loyiha nafaqat O‘zbekistonda, balki xorijda ham e’tibor qozondi — to‘plam haqida xorijiy nashrlar, jumladan, ELLE Kazakhstan ham yozdi.

Bank kartalari 2026
Kartaning amal qilish muddati tugaydi, materialning tarixi esa davom etadi
Bank kartasining amal qilish muddati bor. U tayyorlangan materialning esa tarixi ancha uzoq davom etadi.
2026-yilda bank va filiallarda eski hamda yaroqsiz kartalarni yig‘ishni boshladik. Shredderdan o‘tkazilgach, ular keyinchalik qayta ishlashga yo‘naltirilishi mumkin bo‘lgan plastik granulalarga aylanadi. Jami qariyb 700 kg karta plastigi yig‘ildi.
Materialning bir qismi Ipak Yuli Bank kartalarining kichik shaklidagi kalit osmalarini tayyorlash uchun ishlatilmoqda. Birinchi bosqichda 300 ta kalit osmasi va 600 ta mini-karta tayyorlandi. Bu yig‘ilgan materialning faqat bir qismi. Qayta ishlash jarayoni davom etmoqda va undan kelajakda yana qanday foydali buyumlar yaratish mumkinligini izlamoqdamiz.

Biz bilan birga

Ipak Recycling atrof-muhitga mas’uliyatli munosabat yondashuvimizni qo‘llab-quvvatlaydigan hamkorlar yordamida rivojlanmoqda.
Festival tashkilotchilari tadbirlardan keyin foydalanilgan buyumlarni saqlab qolishga yordam beradi, ishlab chiqarish hamkorlari ularni qayta ishlash yo‘llarini topadi, dizaynerlar esa ulardan yangi mahsulotlar yaratadi. Xayriya tashkilotlari tayyor mahsulotlarni ularga ayniqsa kerak bo‘lgan insonlarga yetkazishga ko‘maklashadi.
Har bir hamkor umumiy g‘oyamizga o‘z hissasini qo‘shadi. Bu — chiqindilarni kamaytirish va foydalanilgan buyumlardan qayta foydalanish yo‘llarini topishdir.
Blog
Fashion Edition iştirokçolarining hikoyasi: eskizlardan moda haftaligigaça
Ipak Creators — Ipak Yuli Bankning yoş isteʼdodlarni qöllab-quvvatlaşga qaratilgan taşabbusi