
2026-yil 13-oktabr kuni Toshkent shahrida turli mamlakatlardan ayol yetakchilar, texnologiya sohasi, moliya sektori va biznes vakillarini birlashtirgan xalqaro “Building the Big Future” Women in Tech Leadership Forum bo‘lib o‘tdi. Ipak Yuli Bank forumning oltin hamkori sifatida ishtirok etdi, shu orqali ayollar yetakchiligini rivojlantirish, tadbirkorlikni qo‘llab-quvvatlash hamda ayollarning texnologiya va moliya sohalaridagi imkoniyatlarini kengaytirishga sodiqligini yana bir bor tasdiqladi.
Forumning biznes dasturi doirasida Ipak Yuli Bank nomidan Loyihalarni boshqarish departamenti boshlig‘i o‘rinbosari Zumrad Nazarova ishtirok etdi. U raqamli transformatsiya, loyihalarni boshqarish va bank sektorida innovatsion yechimlarni rivojlantirish borasidagi kasbiy tajribasi bilan o‘rtoqlashdi.
Ayollarni qo‘llab-quvvatlash — Ipak Yuli Bank strategiyasining bir qismi
Ipak Yuli Bank uchun ushbu forumda ishtirok etish shunchaki xalqaro tadbir doirasidagi hamkorlik emas, balki ayollarning kasbiy va tadbirkorlik salohiyatini rivojlantirish uchun imkoniyatlar yaratishga qaratilgan izchil faoliyatning davomi hisoblanadi.
Bank ayollar tadbirkorligini qo‘llab-quvvatlash, moliyaviy inklyuzivlikni rivojlantirish hamda zamonaviy moliyaviy va raqamli yechimlardan foydalanish imkoniyatlarini kengaytirishni o‘z strategiyasi va ESG kun tartibining muhim yo‘nalishlari sifatida ko‘radi.
Alohida e’tibor ayollar nafaqat moliyaviy xizmatlardan foydalanishi, balki o‘z biznesini rivojlantirishi, yangi texnologiyalarni o‘zlashtirishi, kasbiy salohiyatini ro‘yobga chiqarishi va rahbarlik lavozimlarini egallashi uchun zarur shart-sharoitlarni yaratishga qaratiladi.
Tashabbuslardan natijalargacha
Ipak Yuli Bankning ayollarni qo‘llab-quvvatlash borasidagi faoliyati aniq natijalar bilan mustahkamlangan. 2025-yil yakuniga ko‘ra, bank ayol tadbirkorlarning 7 937 ta loyihasini jami 4,5 trillion so‘m miqdorida moliyalashtirdi. Bu ayollar biznesini rivojlantirish va ularning iqtisodiy imkoniyatlarini kengaytirishga xizmat qilmoqda.
Buning amaliy misollaridan biri — Ipak Yuli Bank tomonidan Visa bilan hamkorlikda 2026-yil aprel oyida O‘zbekistonda ishga tushirilgan global She’s Next tashabbusidir.
Kelajak taraqqiyotiga qo‘shilayotgan hissa
Women in Tech Leadership Forumda ishtirok etish Ipak Yuli Bank uchun o‘z xodimlarining kasbiy tajribasini namoyish etish, xalqaro hamjamiyat bilan tajriba almashish hamda gender tengligi va inklyuziv rivojlanish tamoyillariga sodiqligini yana bir bor tasdiqlash imkonini berdi.
Forum yakunida Ipak Yuli Bank e’tirof sertifikati bilan taqdirlandi.
Bank ayollar tadbirkorligini rivojlantirish, kasbiy yetakchilikni qo‘llab-quvvatlash hamda moliya va texnologiya sohalarida ayollar imkoniyatlarini kengaytirishga qaratilgan tashabbuslarni qo‘llab-quvvatlashda davom etadi.


